បាងកក៖ អតីតនាយករដ្ឋមន្ត្រីដ៏មានឥទ្ធិពលរបស់ថៃ លោក ប្រាយុទ្ធ ចាន់អូចា ដែលបច្ចុប្បន្នជារដ្ឋមន្ត្រីក្រសួងការពារជាតិថៃ បានអញ្ជើញទទួលជួបស្វាគមន៍អគ្គមេបញ្ជាការរង និងជាមេបញ្ជាការកងទ័ពជើងគោកព្រះរាជាណាចក្រកម្ពុជា លោកឧត្តមសេនីយ៍ឯក ហ៊ុន ម៉ាណែត នៅរាជធានីបាងកក ប្រទេសថៃ។

លោក ហ៊ុន ម៉ាណែត បានសរសេរនៅលើហ្វេសបុកផេករបស់លោកនៅព្រឹកថ្ងៃអង្គារ ទី២០ ខែកញ្ញានេះថា៖ «ជួបសម្តែងការគួរសមជាមួយនាយ ឧត្តមសេនីយ៍ ប្រាយុទ្ធ ចន្ទអូចា»។

ចំពោះព័ត៌មានលម្អិតនៃជំនួបនេះ EAC News នឹងជម្រាបជូននៅពេលបន្ទាប់។

អតីតអគ្គមេបញ្ជាការកងភូមិន្ទថៃ លោក ប្រាយុទ្ធ ចាន់អូចា បានធ្វើរដ្ឋប្រហារទម្លាក់លោកស្រី យីងឡាក់ ស៊ីនវ៉ាត់ត្រា ពីតំណែងនៅឆ្នាំ២០១៤ និងបានតែងតាំងខ្លួនឯងជានាយករដ្ឋមន្ត្រីចាប់ពីពេលនោះមក។ លោកក៏ត្រូវបានជាប់ឆ្នោតជានាយករដ្ឋមន្ត្រីនៃប្រទេសថៃនៅឆ្នាំ២០១៩ បន្តទៀត មុននឹងត្រូវបានតុលាការធម្មនុញ្ញប្រទេសថៃដកដំណែងនៅពេលថ្មីៗនេះតាមការកំណត់របស់រដ្ឋធម្មនុញ្ញដែលកំណត់ថានាយករដ្ឋមន្ត្រីមានសិទ្ធិកាន់អំណាចត្រឹម ៨ឆ្នាំ។ បច្ចុប្បន្នលោកបានបន្តតំណែងជារដ្ឋមន្ត្រីក្រសួងការពារជាតិនៃព្រះរាជាណាចក្រថៃ៕